Денсаулық сақтау министрлігінің Санитариялық-эпидемиологиялық бақылау комитеті Қазақстанда фаст-фуд пен зиянды тағамдардың жарнамасына шектеу қоймақ, деп хабарлайды aqshamnews.kz
"Азық-түлік маркетингінің балаларға зиянды әсерін түсіне отырып, Дүниежүзілік денсаулық сақтау ұйымы балаларға бағытталған тамақ және алкогольсіз сусындар маркетингі бойынша ұсыныстар жинағын әзірледі. Оған сәйкес "2025-2026 жылдарға арналған дұрыс тамақтануға жәрдемдесу" іс-шараларын іске асыру жөніндегі Жол картасына тиісті іс-шараларды енгізе отырып, азық-түлік бейінін әзірлеуге кірісті. Қоректік заттардың профилін әзірлеу балаларға бағытталған қаныққан майлар, транс май қышқылдары, бос қанттар мен тұзы жоғары тағам маркетингінің әсер ету ауқымы мен сипатына мониторинг жүргізу мен бағалауға, сондай-ақ қорытындысы бойынша тиісті шаралар қабылдауға мүмкіндік береді", – дейді мамандар.
Комитеттің мәлімдеуінше, қоректік заттардың профилін анықтау – бұл халық арасында, соның ішінде балаларда жұқпалы емес аурулардың алдын алу үшін құрамында қант, тұз, транс майларының артық мөлшері бар өңделген тағамдарды жіктеу немесе саралау әдісі.
Азық-түлік маркетингі – семіздікке әкелетін ортаның маңызды элемент, өйткені ол белгілі бір тағамдық артықшылықтарды, сатып алуларды және тұтыну әдеттерін енгізу арқылы дұрыс емес диетаны насихаттайды.
"Өкініштісі сол, балалар мен жасөспірімдер көбінесе қант, кондитерлік өнімдер, фаст-фуд және дайын таңғы ас сияқты май, қант және тұзы жоғары тағамдарды жарнамалайтын азық-түлік өндірушілерінің маркетингтік стратегияларының мақсатты аудиториясына айналуда", – делінген хабарламада.