Мәжіліс депутаты Ермұрат Бапи Германиядағы «Шарите» клиникасында ем алу үшін шақырту алғанын растады. Шілде-тамыз айларында ол денсаулығына байланысты және улану болжамына қатысты Германияда диагностикадан өткен, деп хабарлайды aqshamnews.kz
Бапи өзінің диагнозын алғанын саясаткер және кәсіпкер Болат Әбіловпен өткізген тікелей эфирде айтып берді. Депутат «Шарите» клиникасында ем алу үшін шақырту алғанын, бірақ қандай аурудың диагнозы қойылғанын нақтыламағанын айтты. Сонымен қатар, оның денсаулығының жақсарғанын атап өтті.
«Денсаулығым әзірге жақсы. Германияда диагноз қойылды, енді емделу керек болады. Жоспарым — алдымен емделу. Екіншіден, саяси маусым басталады», — деп қысқаша түсіндірді Ермұрат Бапи.
Депутат оның ағзасында қандай да бір уландырушы заттардың іздері табылды ма деген сұраққа теріс жауап берді.
«Әйтпесе, мен қазір сіздердің алдарыңызда отырмас едім», — деп әзілдеді депутат.