Ерлан Қошанов Қазақстанның түкпір-түкпірінен келген ең белсенді әйелдермен, «AMANAT» партиясының Әйелдер қанаты аясында ұйымдастырылған «Tomiris» жобасының қатысушыларымен кездесті. Бұл жүздесуде 200-ден астам әйел саяси көшбасшылықты үйреніп, ел болашағы үшін маңызды шешімдер қабылдауға өз үлестерін қосуға дайын екендіктерін көрсетті.
Әйелдер қанаты бір жарым жылда «AMANAT» партиясының негізгі қозғаушы күштерінің біріне айналды. «Tomiris» жобасына қатысушылар Жолдау қазіргі сын-қатерлерге жауап береді деп бірауыздан келісті. Әсіресе, елімізде байқалып отырған энергия тапшылығы мәселесін шешудің ең тиімді жолы – атом электр станциясын салу екенін де қолдады.
Кездесуге қатысқан Ядролық физика институтының ғылыми хатшысы Қарлығаш Мұнасбаева мен осы институттың ядролық және физикалық қауіпсіздік оқу орталығының бастығы Наталья Измайлова атом электр станциясын салудың қауіпсіздігіне қатысты ғылыми тұрғыдан өз ойларын білдірді. Олардың айтуынша, бұл жоба экологиялық талаптарға толық жауап береді және жаңа технологиялардың арқасында Қазақстан халқы үшін ешқандай қауіп төндірмейді.
Наталья Измайлова атап өткендей, Қазақстанда атом энергетикасы саласында жұмыс істейтін жоғары білікті мамандарды даярлау үшін барлық база бар. Жас ұрпақты ядролық инженерияны таңдауға және еліміздің энергетикалық тұрақтылығы мен қауіпсіздігін қамтамасыз етуге үлес қосуға шақырамыз.
Сарқан ауылынан келген кәсіпкер Кенжетай Тазабекова АЭС құрылысы бойынша референдум өткізу – «Халық үніне құлақ асатын мемлекет» тұжырымдамасын жүзеге асырудың нақты көрінісі екенін атап өтті. Жаңартылған Конституцияға халық дауыс берген кезде де дәл осылай болған еді. Уақыт пен осы реформалар таңдаудың дұрыс болғанын көрсетті.
Бұл жолы да бірлесіп, тағы бір ортақ, батыл шешім қабылдап, елімізде атом электр станциясын салуға дауыс беруіміз керек!