Қазақстандағы өңірлік журналистиканы дамыту мен әріптестер арасындағы байланысты нығайту бағытында Бас редакторлар клубы еліміздің стратегиялық маңызы зор әрі республикалық арнайы статусы бар Алматы қаласына ресми өкіл тағайындады.
Енді Алматыдағы медиажобаларды жүзеге асыруға белгілі медиаменеджер, «Alatau Aqparat» медиахолдингінің бас директоры Ержан Қалымбайұлы жауапты болады.
Ержан Қалымбайұлы – отандық журналистиканың танымал өкілдерінің бірі. Ол түрік және ағылшын тілдерін меңгерген, Ыстамбұл университетінің (Түркия) докторанты. Еңбек жолын Қарағанды облыстық «Орталық Қазақстан» газетінде қатардағы тілші болып бастаған. Кейін «Қазақстан РТРК» АҚ Қарағанды облыстық филиалында, «Жебе» және «Айқын» республикалық газеттерінде, «Хабар агенттігі» АҚ, «Qazaq radiosy», «Еларна» телеарнасында түрлі лауазымдарда қызмет атқарды.
Сонымен қатар, ол халықаралық ұйымдарда және мемлекеттік қызметте тәжірибе жинаған. Бұған қоса, «ULYS» халықаралық диджитал журналы мен ulys.kz ақпараттық-сараптамалық сайтының негізін қалаушы әрі бас редакторы болды.
2023 жылдан бері Ержан Қалымбайұлы «Alatau Aqparat» медиахолдингінің бас директоры қызметін атқарып келеді. Холдинг құрамына «Almaty Aqshamy» және «Вечерний Алматы» газеттері, сондай-ақ aqshamnews.kz, vecher.kz және alnews.kz сайттары кіреді.