Алматы әкімдігі қатты тұрмыстық қалдықтарды жинау және шығару үшін инфрақұрылымды сапалы жаңғырту жұмыстарын белсенді түрде жалғастыруда.
2024-2025 жылдары қалада ҚТҚ (қатты тұрмыстық қалдықтар) жинауға арналған 2905 тереңдетілген контейнерлер орнатылады. Бұл туралы Алматы әкімі Ерболат Досаев Алмалы ауданының тұрғындарымен кездесу барысында мәлімдеді.
Әкімнің айтуынша, 2012 жылдан бері орнатылған барлық контейнерлер реконструкцияланады. Сонымен қатар, 516 жаңа тереңдетілген контейнер алаңы салынады, олардың жартысы ағымдағы жылдың соңына дейін орнатылады.
"Агрессивті ортаның әсерінен қоқыс жәшіктерінің металы тез ескіреді. 2025 жылдың соңына дейін барлық тозған контейнерлерді түгел ауыстырамыз", - деді Ерболат Досаев.
Алматыда өткен жылдың соңында тереңдетілген қоқыс контейнерлерін орнату жұмыстары басталды. Олардың артықшылығы - герметикалы және бұралқы иттер мен құстар оларға жете алмайды. Сондай-ақ, тереңдетілген контейнерлер жағымсыз иісті таратпайды әрі эстетикалы.
"Халықаралық тәжірибеге сәйкес, біз қапшықты контейнерлерді орнатуды жоспарлап отырмыз. Қызмет көрсету тұрғысынан - қоқыс контейнерлерін жуу, санитарлық тазартуда шүберектен жасалған қапшықты контейнерлер әлдеқайда тиімді. Сонымен қатар, биыл біз 1800 еуроконтейнерді ауыстырамыз", - деп атап өтті әкім.
Бұл шаралар Алматы қаласының экологиялық жағдайын жақсартуға және қала тұрғындарының өмір сүру сапасын арттыруға бағытталған.