Әлеуметтік медициналық сақтандыру қорының Алматы қалалық филиалы хабарлауынша, 2026 жылғы 1 қаңтардан бастап МӘМС жүйесіне кемі бес жыл бойы тұрақты жарна төлеген азаматтардың мәртебесі төлем уақытша тоқтаған жағдайда да алты ай бойы сақтандырылады, деп хабарлайды aqshamnews.kz
«Міндетті әлеуметтік медициналық сақтандыру туралы» заңға енгізілген өзгерістер аясында қабылданған жаңа норма бұрын МӘМС жүйесіне тұрақты жарна төлеп келген, бірақ уақытша табыссыз қалған азаматтарға қатысты.
«Егер азамат МӘМС жүйесіне кемінде бес жыл қатарынан жарна төлеген болса, оның сақтандыру мәртебесі алты ай бойы сақталмақ. Мұндай жағдайға көбіне жұмысынан айырылып, уақытша жұмыссыз қалған адамдар тап болуы мүмкін. Бірақ бұл жеңілдікті жүйедегі барлық төлеушілер бірдей қолдана алады», – деді МСҚ Алматы қалалық филиалының директоры Ілияс Мұхамеджан.
Бұл өзгерістер жұмысынан айырылған немесе уақытша қаржылық қиындықтарға тап болған тұрғындардың медициналық көмектен қағылмауын қамтамасыз етеді. Бірақ табыс тұрақтанғаннан кейін төленбеген айлар үшін берешекті өтеу қажет болмақ. Жарна төленбей қалған айлар үшінтөлемді дербес төлеуші ретінде төлеуге болады. 2026 жылы бұл санаттағы азаматтар үшін ай сайынғы жарна мөлшері 4 250 теңгені құрайды.
Айта кету керек, қазіргі қолданыстағы нормаға сәйкес, төлемдер тоқтаған жағдайда сақтандырылған мәртебесі 3-ақ ай сақталады. Алдағы уақытта бұл талап та сақталып қалмақ.