Генерал-майор С.Исабаевтың құрметіне ескерткіш-тақта орнатылды
Көрнекті мемлекет және қоғам қайраткері, ҚР ІІМ құрметті ардагері, полиция генерал-майоры Слям Исабаевтың құрметіне мемориалдық ескерткіш-тақта қойылды.
Ол ішкі істер органдары жүйесінде еңбек етіп, қатардағы сарапшы-криминалист, тергеушіден бастап, ҚР ІІМ Тергеу басқармасы басшысының орынбасары лауазымына дейін көтерілген. 1985–1990 жылдары Алматы облыстық ІІБ басшысы болған. 1990 жылдың маусым айында бекіту тәртібімен Алматы қаласының ҚІІБ басшысы болып, одан кейін ҚР ІІМ министрінің орынбасары болып тағайындалған. ҚР Жоғарғы Кеңесінің 11 медалімен және Құрмет Грамотасымен марапатталған.
– Мен Сляммен 1980 жылдардан таныс болдым. Оның ұйымдастырушылық қабілетінің арқасында қылмыстық істерді атқару, тергеп, тексеру барысында жұмыстар жүйелі жүрді. Өз еңбегіне адал, әскери тәртіпті мығым ұстанатын жандардың бірі болды. Өмірінің соңына дейін полиция қызметкерлеріне тәжірибесімен бөлісті. Саналы ғұмырын елін, жерін қорғауға бар күшін сарп етті. Слям Исабековтің іскерлігі, талаптылығы жастарға үлгі-өнеге болып қалатынына сенімдімін, – дейді Ішкі істер министрінің кеңесшісі, полиция генерал-майоры Өмірзақ Болсамбеков.
Іс-шараның өтуіне Алматы қаласының мәдениет басқармасы мұрындық болды. Мемориалдық тақтаның салтанатты ашылу рәсіміне полиция қызметкерлері, дос-жарандары, мемлекет және қоғам қайраткерлері, шәкірттері қатысты. Ал Слям Исабаевтың қызы келген қонақтар мен Алматы қаласының әкімдігіне алғысын білдірді.