Биыл жүз жасқа толып, ғасырмен құрдас атанып отырған керемет тұлға – Сәруар Ғаниқызы Мұхамадееваны өзінің табысты еңбек жолымен жастарды шабыттандырудың үлгісі деуге болады. Ол өмірінің жарты ғасырында Жер қатынастары және жерге орналастыру жөніндегі мемлекеттік ғылыми-өндірістік институтында адал қызмет еткен аяулы жан. Бүгін мерейтой иесін бұрынғы әріптестері үйіне барып құттықтап, денсаулық тіледі.
Сәруар Мұхамадееваның еңбек жолы жоғары жауапкершілікпен, кәсібилікпен және адалдықпен ерекшеленеді. Еңбек кітапшасындағы жалғыз жазба оның жер қатынастары және жерге орналастыру жөніндегі мемлекеттік ғылыми-өндірістік институтында 50 жыл бойы табанды да табысты еңбек еткенін көрсетеді. Осы уақыт ішінде ол жас маманнан әріптестерінің құрметіне ие болған абыройлы, жоғары білікті қызметкерге дейінгі жолдан өтті.
Сәруар Ғаниқызы жерге орналастыруда инновациялық әдістер мен технологияларды әзірлеуге және енгізуге елеулі үлес қосты. Оның кәсібилігі мен тәжірибесі ол қатысқан барлық жобаларда табысқа жетудің ажырамас факторлары болды. Оның әріптестері мен басшылары оның кәсібилік, жауапкершілік және ұқыптылық деңгейін әрқашан жоғары бағалады.
Осындай жанды ұмыту мүмкін емес. 100 жасап отырған қария барлық құрметке лайықты. Қазір Сәруар әжей қызы Ләйла Кокубаеваның қамқорлығында.
«Сәруар Ғаниқызы айналасындағы жандардың отбасылық жағдайына да алаңдап, қамқор болып жүретін. Қаншама жастың материалдық жағдайының жақсаруына өлшеусіз үлес қосты. Ал өзіне келгенде пәтер сұрап немесе дербес зейнетақы аламын деп ұмтылмаған жан. Бұл қасиеті көпке үлгі болуға тиіс», – дейді 40 жылдай бірге жұмыс істеген әріптесі Бақыткүл Дүйсенбекова.
Ал ДАПОиКИР директоры Болат Жылқыбеков: «Біз жерге орналастыру саласына үлес қосқан аға ұрпақ еңбегін ұмытпаймыз. Сәруар Ғаниқызы еңбек еткен мекеме бүгінде «Азаматтарға арналған үкімет» мемлекеттік корпорациясы құрамында. Корпорация басшылығы осы салаға жетекшілік ететін Басқарма төрағасының орынбасары Ғалым Қарқынбаевтың тапсырмасымен ардагерімізді мерейтойымен құттықтап, басшылықтың медалі мен құттықтауын тапсырдық. Аға ұрпақтың өнегелі ісі жастарға әркез үлгі және ұмытылмақ емес», – деген ықыласын жеткізді.