Биыл қазақтың көрнекті композиторы, дирижер Нұрғиса Тілендиевтің туғанына 100 жыл толады.
2023 жылы Әзербайжанда өткен ТҮРКСОЙ-ға мүше мемлекеттердің мәдениет министрлері Тұрақты кеңесінің 40-шы отырысының қорытындысы бойынша, 2025 жыл ұлы композитордың 100 жылдық мерейтойына орай ТҮРКСОЙ ұйымы аясында Нұрғиса Тілендиевті еске алу жылы болып жарияланды, деп хабарлайды aqshamnews.kz.
Қазақстанда және шет елдерде композитордың өмірі мен шығармашылығына арналған естелік іс-шаралар өтуде.
Нұрғиса Тілендиевтің 100 жылдығы Түркияда да атап өтілді. Анкарада ТҮРКСОЙ ұйымы аясында еске алу жылының ашылу салтанаты өтті. Түркі әлемінің көрнекті қайраткеріне арналған іс-шара барысында Нұрғиса Тілендиевтің шығармалары орындалып, оның өмірі мен шығармашылығы туралы көрме қойылып, қысқаметражды фильм ұсынылды.
ҚР Ұлттық кітапханасында да Нұрғиса Тілендиевті еске алу кеші өтті.
Іс-шараға композитордың қызы, Н.Тілендиев атындағы «Отырар сазы» Мемлекеттік академиялық фольклорлық-этнографиялық оркестрінің көркемдік жетекшісі және бас дирижері Динара Тілендиева, сондай-ақ консерватория, музыкалық колледж студенттері мен мектеп оқушылары, кітапхана оқырмандары мен кеш қонақтары қатысты.
Кездесуде «Отырар сазы» оркестрі Нұрғиса Тілендиевтің шығармаларын орындады. Сондай-ақ, «Дәуір үні – Нұр-аға» кітап көрмесі ұйымдастырылып, кітапхананың үлкен залында композитордың мемориалдық музейінің экспозициясы ұсынылды. Көрмеге Нұрғиса Тілендиевтің фотосуреттері, марапаттары, «Болмасын соғыс, болмасын!» туындысының нотасы, жеке домбырасы және басқа да құнды дүниелері қойылды.
Қазақтың көрнекті композиторының 100 жылдығына арналған іс-шаралар жыл бойы атап өтіледі.