Оқушылар енді 173 күн оқиды.
Бұл туралы Оқу-ағарту бірінші вице-министрі Шолпан Каринова айтты, деп хабарлайды Almaty-akshamy.kz ҚазАқпаратқа сілтеме жасап.
«Жаңа оқу жылында елімізде 7 мыңнан аса мектеп жұмыс істейтін болады. Оларға жалпы саны 3,6 млн бала келеді және оқушыларға 384 мыңнан астам педагог сабақ береді. Дәстүр бойынша, 1 қыркүйекте республиканың барлық мектебінде Білім күніне арналған салтанатты іс-шаралар, сондай-ақ «Терең білім, еңбекқорлық және отаншылдық қасиет» тақырыбында сынып сағаты өтеді», - деді ол Орталық коммуникациялар қызметіндегі баспасөз мәслихатында.
Оның айтуынша, салтанатты шараны өткізу форматын, қатысушылар құрамын білім беру ұйымдары өздері айқындайды.
«Оқу жылы 1 қыркүйекте басталып, 31 мамырға дейін, яғни 36 аптаға созылады. Жаздың алғашқы күнінен бастап оқушылар дәстүрлі түрде жазғы демалысқа шығады. Тиісінше, жаздың 3 айында балалар толығымен демалады. Жалпы, бір оқу жылында балалар 4 рет демалады. Бұл жерде ешқандай өзгеріс жоқ. Жазғы демалыс күндерін қосқанда балалар жалпы 192 күн демалады, ал 173 күн оқиды. Оқу жылының 36 апта болуына байланысты, үш ауысымды мектептерді қоспағанда, 7 мыңнан астам мектеп жаңа оқу жылында бес күндік оқыту режиміне көшеді. Бұл мектептерде 3,4 млн бала және 300 мыңнан астам педагог бар», - деді Шолпан Каринова.