Дауыс беру кешкі 20.00-ге дейін жалғасады.
aqshamnews.kz сайты күні бойы өз оқырманын референдумның барысымен хабардар етеді.
Референдум бюллетенінде "Сіз Қазақстанда атом электр стансасының салынуымен келісесіз бе?" деген сұрақ бар, ал сайлаушылар "Иә, келісемін" немесе "Жоқ, келіспеймін" деп таңдау жасай алады. Сайлаушы өз таңдауын белгілеген жауап нұсқасының жанындағы бос шаршыға кез келген белгіні қою арқылы көрсетеді.
Ресми ақпаратқа сәйкес, 6 қазанда еліміздегі сайлау учаскелерінің көпшілігі сағат 7:00-де ашылып, кешкі сағат 20:00-ге дейін жұмыс істейді. Дауыс беру тізіміне 12,3 миллионға жуық қазақстандық енгізілген.
Референдумға 30 шет мемлекет пен төрт халықаралық ұйымнан (Тәуелсіз Мемлекеттер Достастығы, Шанхай ынтымақтастық ұйымы, Түркі мемлекеттері ұйымы, Азиядағы өзара іс-қимыл және сенім шаралары жөніндегі кеңес) 177 байқаушы қатысады. Сондай-ақ, 14 мемлекеттің сайлау органдарының өкілдері, оның ішінде Әзірбайжан, Беларусь, Тәжікстан және Өзбекстан орталық сайлау органдарының басшылары дауыс беру барысын бақылап отыр.
Қазақстан Республикасы Сыртқы істер министрлігінің мәліметінше, 37 елден 200 шетелдік журналист аккредиттеліп, референдум барысын бақылап, ақпарат таратуда.
Елімізде барлығы 10 323 сайлау учаскесі жұмыс істеуде, сондай-ақ, 59 елде орналасқан шетелдік мекемелерде 74 сайлау учаскесі ашылған. Референдум нәтижелері дауыс беру күнінен бастап жеті күн ішінде бұқаралық ақпарат құралдарында жарияланады.