Ұлыбританияда өтіп жатқан теннистен Уимблдон–2023 турнирінің үшінші айналымында еліміздің бірінші ракеткасы Елена Рыбакина жеңіске жетті.
Елена Рыбакина 1/8 финалдағы бәсекесін өткізіп, ширек финалға өтті, деп хабарлайды Almaty-akshamy.kz.
Оның қарсыласы – WTA әлемдік рейтингінде 13-орында тұрған бразилиялық Беатрис Хаддад-Майя ойынды соңына дейін жеткізе алмады. Матчтың төртінші ойынынан кейін Беатрис денсаулығы сыр бергенін айтып, медициналық үзіліс алды. Физиотерапевтің тексерісінен кейін ойынды жалғастыруға тырысып бақты.
«Беатрис көзіне жас алды, ойынды жалғастырып жатыр. Жеңіс үшін соңына дейін күресуде», – деді тікелей эфирде матч комментаторы.
Алайда бұл соңғы гейм болды, 4:1 есебімен жеңіс қазақстандық спортшының пайдасына тиді. Е.Рыбакина үшін бразилиялық теннисші өте қолайсыз қарсылас еді. Бұл екі теннисші биыл қос кездесу өткізген еді. Абу-Дабидегі (БАӘ) жарыста Беатрис үш партияда басым түсті: 3:6, 6:3, 6:2, ал Штутгарттағы (Германия) додада қазақстандық спортшы 6:1, 3:1 есебімен басым тұрғанда, бәсекені жалғастырудан бас тартты. Әлемдік БАҚ өкілдері осы көрсеткіштерді алға тартып, Хаддад-Майяға жеңіс тілеген еді. Десе де, қазақстандық спортшының жолы болды.