Сенат спикері Мәулен Әшімбаев парламенттік тыңдау барысында еңбек нарығындағы жағдайға қатысты пікір білдірді.
Оның айтуынша, 2030 жылға дейін ел экономикасына барлық сала бойынша қосымша 1,6 миллион маман қажет болады, деп хабарлайды aqshamnews.kz.
Сенат спикері Мәулен Әшімбаевтың айтуынша, Қазақстанда білікті мамандар тапшылығы айқын байқалады. Әсіресе, инженерлер, техникалық мамандар, агрономдар және ветеринарлар жоғары сұранысқа ие.
Бұл үрдіс алдағы жылдары одан әрі күшейе түседі. Еңбек ресурстарын дамыту орталығының болжамына сәйкес, 2030 жылға дейін ел экономикасына барлық сала бойынша қосымша 1,6 миллион маман қажет болады. Оның ішінде шамамен 900 мың маман техникалық және кәсіптік білім беру саласынан, ал 430 мың маман жоғары білімді мамандар қатарынан қажет. Сонымен қатар, құрылыс, ауыл шаруашылығы, өңдеу өнеркәсібі және көлік салаларында кадр тапшылығы айтарлықтай жоғары.
Әшімбаевтың айтуынша, елдегі әр бесінші түлек өз мамандығы бойынша жұмыс істемейді. Бұл кадрларды даярлау жүйесінің қазіргі экономиканың нақты секторындағы сұраныстарға толық сәйкес келмейтінін көрсетеді.
Айта кетейік, бұған дейін Қазақстанда туыстық байланыстардың салдарынан жас мамандардың ғарыш саласынан кетіп жатқаны туралы мәлімет тараған болатын.