Сағадат Нұрмағамбетов атындағы Құрлық әскерлері әскери институтында бүгінде болашақ командирлер ғана емес, заманауи технологияларды жетік меңгерген мамандар да даярлануда, – деп хабарлайды aqshamnews.kz тілшісі.
Солардың бірі – кіші сержант Динара Телеуова. Ол Отан қорғаушы мамандығының ер мен әйелге бөлінбейтінін өз ісімен дәлелдеп келеді.
Әскери дайындықтың саптық, атыс және тактикалық сабақтарымен қатар, Динара ұшқышсыз авиациялық жүйелерді терең меңгеруге ерекше қызығушылық танытады. Ол FPV-дрондарды өз қолымен құрастырып, электрондық бөлшектерін орнатады, ұшу контроллерлерін баптап, алғашқы сынақ ұшуына дейін толық тексерістен өткізеді.
«Әрбір дрон – күрделі инженерлік жүйе. Оның сенімді жұмыс істеуі үшін электроника, бағдарламалық қамтамасыз ету және аэродинамика негіздерін жақсы білу қажет. Мен үшін бұл жай ғана қызығушылық емес, нақты пайда әкелудің мүмкіндігі», – дейді Динара Телеуова.
Бүгінде ұшқышсыз технологиялар әлемнің жетекші армиялары үшін стратегиялық маңызды бағыттардың біріне айналды. Осыған байланысты Құрлық әскерлері әскери институтында ұшқышсыз ұшу аппараттарын пайдалану, техникалық қызмет көрсету және құрастыру дағдыларын меңгерген мамандарды даярлауға ерекше көңіл бөлінеді.
Оқытушылардың айтуынша, кіші сержант Динара Телеуова жоғары тәртіптілігімен, техникалық ойлау қабілетімен және білімін үнемі жетілдіруге деген ұмтылысымен ерекшеленеді. Ол жаңа технологияларды қызығушылықпен меңгеріп, осыдан бірнеше жыл бұрын тек инженер мамандардың саласы саналған заманауи жабдықтармен сенімді жұмыс істейді.
Динараның оқиғасы – қазіргі әскери қызметшілердің әскери даярлықты озық технологияларды игерумен табысты ұштастыра алатынының жарқын үлгісі. Оның жетістігі өзгелерді де күрделі міндеттерден қорықпай, инженерлік қабілеттерін дамытып, заман көшінен қалмауға ынталандырады.
Қазақстан Қарулы Күштері жылдан-жылға технологиялық тұрғыдан жаңарып келеді. Ал Динара Телеуова сияқты жас мамандар кәсібилік, зияткерлік әлеует және үздіксіз даму арқылы болашақ армиясының жаңа келбетін қалыптастыруға өз үлестерін қосуда.