Алматы облысының Діни мәселелерді зерттеу орталығы терроризмге қарсы іс-қимыл тәсілдері туралы әскери қызметшілердің хабардарлығын арттыру мақсатында профилактикалық іс-шара ұйымдастырды, - деп хабарлайды malim.kz тілшісі.
Шара барысында әскери қызметшілердің құқықтық сауаттылығын арттыру мен экстремистік ұйымдарға тартылудың алдын алуға бағытталған сыни ойлау қабілетін дамыту мәселелеріне баса назар аударылды.
Кездесуге «ҚР ҰҰ 3660» әскери бөлімінің мерзімді қызметтегі сарбаздары қатысты. Негізгі спикер – дінтанушы, ақпараттық-түсіндіру тобының мүшесі Уәли Қайсар Ержанұлы болды. Ол радикалды идеологияның белгілері туралы жан-жақты түсіндіріп, экстремистік ұйымдар қолданатын манипуляциялық тәсілдерді анықтау жолдарымен бөлісті.
Әңгіме барысында қауіп-қатерлер туралы ғана емес, олардан қалай сақтануға болатыны жөнінде нақты тәсілдер де айтылды. Мысалы, діни ағартушылық пен идеологиялық ықпалдың айырмашылығын ажырату жолдары талқыланды.
Іс-шара соңында қатысушылар мұндай бастамалар әскери қызметшілердің радикалды идеология мен деструктив әсерлерге қарсы тұру қабілетін арттыруға көмектесетініне сенім білдірді.
