18 ақпанда Алматы қаласы музейлер бірлестігінің ұйымдастыруымен Ықылас атындағы халық музыкалық аспаптар музейінде Қазақстан Республикасының Халық әртісі, әлемге танымал әнші Димаш Құдайбергеннің жеке коллекциясынан құралған "Димаш: бір дауыс – мың ел" атты көрменің ашылуы өтті. Салтанатты ашылу рәсіміне өнер иесі арнайы қатысып, көрменің тұсауын өзі кесті, – деп хабарлайды aqshamnews.kz тілшісі.
Көрмеге өнерпаздың жеке қорынан 70 музыкалық аспап қойылған. Олардың қатарында әлемнің түкпір-түкпірінен жанкүйерлері тарту еткен ұлттық аспаптар бар. Сондай-ақ әншінің сахнада киген костюмдері таныстырылды. Әсіресе, Майкл Джексоннің жеке стилисі Гоко Залди арнайы дайындаған сахналық киім көрермендердің назарын аударды.
Димашқа ең алғаш сыйға тартылған аспаптардың бірі – Беларусь фан-клубы ұсынған гусли. Уақыт өте мұндай тартулар саны айтарлықтай артты, алайда көрмеге соның ішінен 70-і ғана әкелінді. Мұндағы жәдігерлер Куба, Ирландия, Малайзия және өзге де елдерден жеткізілген. Әр аспап – сол мемлекеттердің таңдаулы шеберлерінің қолынан шыққан бірегей туынды" - деді Светлана Айтбаева.
Іс-шара аяғында Димаш Құдайберген мұражайға бала күнінде атасы сыйлаған, шығармашылық жолына серік болған қастерлі домбырасын тарту етті.
Көрме 1 ай көлемінде Алматы қаласы, Зенков көшесі, 24а мекенжайында орналасқан Ықылас атындағы халық музыкалық аспаптар музейінде жалғасады.
