Сыбайлас жемқорлыққа қарсы қызметтің төрағасы Асхат Жұмағали халық әртісімен кездесті.
Қазақстандағы жемқорлықпен күресуге енді әйгілі әнші Димаш Құдайберген де көмектесетін болады, деп хабарлайды aqshamnews.kz
Антикор басшысы мен өнер иесінің кездесуі жәй әңгіме форматында ғана өткен жоқ, олар өнердің жемқорлыққа тосқауыл қоюға қалай ықпал ете алатынын талқылады.
Агенттік төрағасы өнер жұлдызына жемқорлықтың алдын алу бойынша жасалып жатқан жұмыстар және онымен күресуде қандай замануи әдістер қолданылатыны жайлы түсіндірген. Сондай-ақ Антикор төрағасы жемқорлықпен күрес мәселесінде өнер саласы оң септігін тигізеді деп санайды.
«Тараптар сыбайлас жемқорлық деңгейін төмендетуге, мәдени және білім беру бастамалары арқылы парасаттылық қағидаттарын насихаттауға бағытталған қоғамдағы заңдылық пен тәртіп қағидаттарын ілгерілету шеңберіндегі бірлескен жобаларды талқылады»,– делінген Антикор хабарламасында.
Димаш Құдайберген де атқарылып жатқан жұмыстарға және болашақтың игілігі үшін сыбайлас жемқорлыққа қарсы іс-қимыл ісіне қолдау білдіруге қарсы еместігін жеткізді.