Мәжіліс депутаты Дәулет Тұрлыханов елімізде медицина қызметкерлерінің тапшылығы туралы айтты, - деп хабарлайды Аqshamnews.kz тілшісі.
Ол бұл мәселе бойынша сауалын денсаулық сақтау министрі Ақмарал Әлназароваға жолдады.
"2024 жылдың қорытындысы бойынша Қазақстанда 3 954 дәрігер жетіспейді. Сондай-ақ, орта буын медицина қызметкерлерінің арасында 4 505 адам тапшы", - деді депутат.
2025 жылғы 1 қаңтарға қарай денсаулық сақтау саласында шамамен 275 мың маман жұмыс істейді: олардың 83 мыңнан астамы дәрігер, ал 191 мыңға жуығы – орта медицина қызметкерлері.
Алайда соған қарамастан, кадр тапшылығы мәселесі шешілмей отыр. Тапшы мамандар қатарында терапевтер, жалпы практика дәрігерлері, педиатрлар, акушер-гинекологтар, хирургтер мен анестезиолог-реаниматологтар бар.
"Мысалы, Қостанай облысында 2025 жылдың алғашқы жартыжылдығында 326 маман жетіспейді. Осындай жағдай Ақмола, Жамбыл және Түркістан облыстарында да байқалады", – деді Тұрлыханов.
