Мәжіліс депутаты Елнұр Бейсенбаев премьер-министрдің орынбасары Ералы Тоғжановқа жолдаған депутаттық сауалында жасөспірімдер арасындағы қылмыс пен қайғылы оқиғаларды көтерді, - деп хабарлайды Аqshamnews.kz тілшісі.
15 күнде – 3 қаза
Жамбыл облысында оқу жылы басталғалы үш жасөспірім түрлі жанжал салдарынан көз жұмған.
-
Таразда 9-сынып оқушысы мектеп дәретханасында төбелес кезінде қаза тапты.
-
Шу ауданында футбол ойыны кезінде туған жанжалдың соңы 10-сынып оқушысының өліміне әкелді.
-
Ал 1 қыркүйекте колледжге енді түскен студент қатарласын пышақтап өлтірген.
"Бас-аяғы 15 күннің ішінде бір ғана өңірде 3 бірдей оқушының кісі қолынан ажал құшуы – дабыл қағарлық жағдай!" – деді депутат.
Ресми статистика
2024 жылы жасөспірімдердің қатысуымен 1 973 қылмыс тіркелсе, оның ішінде 130-ы - аса ауыр қылмыс. Ал биылғы сегіз айда 938 қылмыс болған. Жыл аяғына дейін бұл көрсеткіш былтырдан да асып түсуі мүмкін.
Қылмыстың көбі Шымкент (131), Алматы (115) және Астана (92) қалаларында тіркелген.
Себеп неде?
Депутат жағдайдың ушығуына бірнеше факторды атады:
-
мектептерде тәрбие жұмысының қағаз жүзінде қалып қоюы;
-
балалардың эмоциясын басқару дағдысының дамымауы;
-
мектеп психологтарының жеткіліксіздігі;
-
ювенал полиция мен комиссиялардың формалды жұмысы;
-
ата-аналардың жауапкершілігінің төмендігі;
-
смартфонға тәуелділік.
Ұсыныстар
Елнұр Бейсенбаев бұл жағдайды тоқтату үшін мынадай шараларды ұсынды:
-
Барлық мектепке антибуллингтік бағдарламаны енгізу.
-
Психологиялық көмек қызметін күшейтіп, балаларға эмоцияны басқару мен жанжалдың алдын алу дағдыларын үйрету.
-
Спорттық және көпшілік іс-шараларды құндылықтарға тәрбиелеу мен командалық рухты арттыруға бағыттау.
-
Мектептерде смартфон пайдалануды шектеу.