Алматы қаласындағы №118 мектеп-гимназиясында 1 маусым – Халықаралық балаларды қорғау күніне орай ерекше медициналық-профилактикалық акция ұйымдастырылды. "Денсаулығыңды тексер" атты бұл іс-шара №11 қалалық емханамен бірлесіп өткізілді. Шара аясында мектеп оқушылары медициналық тексерістен өтіп, арнайы сертификат алды.
Балалар денсаулығына назар аударуға бағытталған шараға 120-ға жуық бала қатысты. Акцияның мақсаты мен мазмұны жайлы №11 қалалық емхананың профилактика және психоәлеуметтік көмек бөлімінің меңгерушісі Алёна Зекунова айтып берді.
"Бұл шара балалардың денсаулығын қорғауға, аурулардың алдын алуға бағытталған. Бүгінгі медициналық тексеру – балалар үшін аса маңызды профилактикалық шара. Мұндай тексерулер бала денсаулығын бақылауда ұстауға, ауруларды ерте кезеңде анықтауға, сонымен қатар оның психофизикалық дамуын бағалауға көмектеседі. Баланың алғашқы дәрігерлік бақылауы ол әлі нәресте кезінде-ақ басталады. Ал бір жастан бастап 17 жасқа дейін олар жыл сайын толық тексерістен өтіп тұруы керек. Кейбір жас кезеңдерінде тереңдетілген диспансерлік бақылау да қарастырылған. Бүгінгі тексеру нәтижесінде балалар арасында жиі кездесетін артық салмақ, көру қабілетінің нашарлауы, сколиоз және кариес сияқты мәселелер анықталды. Бұл аурулар сырт көзге байқалмауы мүмкін, сондықтан осындай жоспарлы профилактикалық шаралар олардың алдын алуға көмектеседі", — дейді Алёна Зекунова.
Арнайы іс-шара балалардың өз денсаулығына назар аударуға ынталандырады дейді №118 мектеп-гимназиясы директорының тәрбие ісі жөніндегі орынбасары Дильназ Нурдун.
"Жыл сайын 1 маусым – Балаларды қорғау күніне орай осындай ауқымды шара ұйымдастырамыз. Биылғы акция да осы дәстүрлі шара аясында өтті. №11 емхананың қолдауымен жүзеге асқан бүгінгі тексеру балалардың өз денсаулығына жауапкершілікпен қарауына түрткі болды деп сенеміз. Балалар өз денсаулығы туралы нақты ақпарат алды. Бұл әрі мектеп, әрі емхана үшін үлкен жетістік деп есептейміз", – дейді Дильназ Нурдун.
Мектеп жасындағы балалардың денсаулығы – қоғам болашағының негізі. Себебі дәл осы кезеңде баланың ағзасы қарқынды дамып, түрлі өзгерістерге ұшырайды. Уақтылы тексеру мен алдын алу – олардың денсаулығын ұзақ жылдарға сақтаудың ең тиімді жолы. «Денсаулығыңды тексер» акциясы балалардың денсаулығына сергек қарауға, салауатты өмір салтын ұстануға, әрі ата-аналар мен ұстаздардың денсаулық тәрбиесіне жауапкершілікпен қарауына зор үлес қосты.