Алматы технология және флористика колледжінің Инклюзивті білім беру ресурстық орталығы ерекше шара ұйымдастырды. Халықаралық саңыраулар күніне арналған III Республикалық инклюзивті «DEAF MADE» фестивалі өтті. Шараның шырайы да, шынайылығы да бөлек - тыныштыққа үйренген жүректердің өз өнерін өзгеше әдіспен жеткізуі көрерменді қайран қалдырмай қоймады.
2025 жылдың Қазақстанда Жұмысшы мамандықтар жылы деп жариялануы бұл фестивальдің мәнін одан сайын арттырды. Себебі шара тек шығармашылық емес, техникалық және жұмысшы мамандықтарды меңгеріп жүрген есту қабілеті бұзылған жастардың әлеуетін танытатын алаңға айналды. Мұнда олардың өнері ғана емес, еңбекке деген ынтасы, мамандыққа деген талпынысы да айқын көрінді. Фестивальге еліміздің түрлі өңіріндегі техникалық және кәсіптік білім беру ұйымдарынан келген студенттер жиналды. Үш жыл қатарынан өткізіліп келе жатқан бұл мәдени шара бір жағынан - өнер додасы, екінші жағынан - инклюзияның нақты көрінісі. Кедергісіз орта, тең мүмкіндік, шығармашылық еркіндік — фестивальдің басты қағидаттары.
Фестивальдің алғашқы бөлімі -«Біздің бренд» өзін-өзі таныстыруы.Екінші бөлім халық биі.
Үшінші бөлім Ым-ишарамен ән айту кезеңі болды.Бұл - фестивальдің ең әсерлі сәттерінің бірі болды. Әр қимыл, әр ишара — сөздің орнына жүретін эмоция. Фестивальдің соңғы бөлімі — «Заманауи этно-стиль» мода театры.
НҰРЫМБЕТОВ Анарбек Қалдарұлы, Алматы технология және флористика колледжінің директоры:
– Бүгін біз есту мүмкіндігі шектеулі жандардың бойындағы ерекше талантты, шексіз шығармашылықты және жігерлі мінезді көпшілікке кеңінен көрсету үшін бас қосып отырмыз. Инклюзивті орта қалыптастыру – қоғамның дамуының басты көрсеткіштерінің бірі. Сол себепті мұндай шаралар әр адамның қабілеті мен мүмкіндігіне жол ашып, өз орнын табуына мүмкіндік береді. Әрбір өнер көрсету, әрбір ұсынылған идея – қарапайым сахналық нөмір емес. Бұл – адамның ішкі мүмкіндігінің молдығын, оның қолынан келмейтін іс жоқ екенін дәлелдейтін шағын жеңіс. Біздің колледж үшін бұл фестиваль ерекше маңызға ие. Себебі мұнда тек талант емес, ең алдымен қайсарлық, төзімділік, өз-өзін дамытуға деген талпыныс көрінеді. Осындай іс-шаралар арқылы қоғамға инклюзивтік мәдениеттің қандай маңызды екенін тағы бір рет көрсету мүмкіндігі туады.
