Оксфорд университетінің ғалымдары жүргізген зерттеу басқалармен бірге жиі тамақтанатын адамдар өзін анағұрлым бақытты сезінетінін және өмірге риза болатынын көрсетті.
Зерттеу биылғы Бақыт туралы бүкіләлемдік баяндама үшін жасалды. Ғалымдар 142 елден 150 мың адамның мәліметін талдады. Сонымен, дастарқан басында көппен бірге ас ішу адамға керемет игі әсер етеді екен. Бұл жасына, жынысына, еліне қарамастан барлық адамға тән жақсы сезім. Жақындарымен бірге түскі-кешкі асты бірге ішетін адамдар жалғыз өзі тамақтанатын адамдарға қарағанда өз өмірін бірнеше баллға жоғары бағалаған. (Сауалнама бойынша 0 – нашар өмір, 10 – керемет өмір).
Тіпті адам жұмыссыз болса да, достарымен кездесіп, бір шыныаяқ шай ішіп жүрсе, өзін жалғыз сезінбейді дейді зерттеушілер. Зерттеуге қарағанда, үлкен қалалардағы жастардың көбі жалғыз тамақтанады екен, бұл урбанизацияға, қаладағы қарбалас тіршілікке байланысты болса керек.
Сегіз жылдан бері Бақытты өмір рейтингі бойынша Финляндия бірінші орында. Халқымыз дастарқанды киелі санайтыны тегін емес.