Орталық сайлау комиссиясының өкілдері 15 наурызға белгіленген республикалық референдумды өткізуге дайындық барысымен танысу үшін Алматыға жұмыс сапарымен келді, – деп хабарлайды aqshamnews.kz тілшісі.
Комиссия төрағасы Нұрлан Әбдіров ҚР Ұлттық кітапханасының ғимаратында орналасқан №254 референдум учаскесіне және ҚазҰАЗУ ғимаратындағы №378 учаскеге барып, ақпараттық стендтерді, материалдық-техникалық қамтамасыз етуді және комиссия мүшелерінің әзірлігін тексерді.
Комиссия өкілдері еліміздің барлық 20 өңірін аралап жүр. Алматыдағы учаскелердің дайындығы жоғары деңгейде деп айтуға болады, – деді Нұрлан Әбдіров.
Кейін делегация Алматы қаласының мемлекеттік органдары өкілдерінің қатысуымен референдумды дайындау және өткізу мәселелері бойынша кеңес өткізді.
Алматы әкімінің орынбасары Абзал Нүкенов қалада дауыс беруге құқығы бар азаматтар тізіміне 1 млн 311 мыңнан аса адам енгізілгенін, оның ішінде шамамен 20 мың студент пен 4 мың әскери қызметші бар екенін айтты.
Ол жергілікті атқарушы органдар, аумақтық және учаскелік комиссиялар арқылы референдумға дайындық аясында ұйымдастырушылық, ақпараттық және өзге де шаралар жоспарлы түрде жүргізіліп жатқанын жеткізді. Ақпараттық қамтуға БАҚ, әлеуметтік желілер және билбордтар, LED-экрандар, медиафасадтар секілді өзге де мүмкіндіктер тартылған.
Алматы қаласы референдум өткізуге толық дайын, – деп атап өтті Абзал Нүкенов.
Кеңесте прокуратура, полиция және ТЖ департаменттері, сондай-ақ Алматы қалалық аумақтық референдум комиссиясының өкілдері дайындық жұмыстары мен референдумға әзірлік деңгейі туралы баяндады.
Алматы қаласы аумақтық референдум комиссиясының төрағасы Айгүл Қалықова барлық учаскеде халықтың жүріп-тұруы шектеулі топтары үшін қажет жағдай жасалғанын (мүгедектігі бар шамамен 10 мың адам есепке алынған) айтты.
Сонымен қатар, Нұрлан Әбдіров пандустар мен көтергіш құрылғылардың, аудиоақпаратқа арналған техникалық құралдардың маңызын еске салды. Сондай-ақ, Брайль қарпі немесе өзге техникалық құралдар арқылы көзі көрмейтін азаматтарға ақпарат жеткізуге дайындықтың болуы маңызды екенін атап өтті.
Негізгі міндет – республикалық референдумды Қазақстан Республикасының заңнамасына толық сәйкес, ешқандай заңбұзушылықсыз өткізу, – деді Нұрлан Әбдіров.
Сонымен қатар, №378 учаскелік референдум комиссиясының қызметі қаралды. Бұл комиссия Қазақ ұлттық аграрлық зерттеу университеті базасында жұмыс істейді. Учаскелердегі дауыс беру процесін ұйымдастыру, материалдық-техникалық қамтамасыз ету және заң талаптарының сақталуы назарға алынды.