«Almaty – менің мақтанышым» жобасын іске асыру аясында және Халықаралық Жер күніне орай Алматы қаласы Ішкі саясат басқармасының Қоғамдық даму орталығы «Бұлақ көрсең, көзін аш» атты экологиялық акция өткізді. Іс-шара 22 сәуір күні Бутаковка шатқалында өтті, – деп хабарлайды aqshamnews.kz тілшісі.
Аталған акцияға қала жастарының белсенді өкілдері – Алматы технологиялық колледжі жанындағы «Ашық жүрек» еріктілер қозғалысының мүшелері қатысты. Іс-шараның негізгі мақсаты – тек тазалық жұмыстарын жүргізу ғана емес, сонымен қатар туған қалаға деген сүйіспеншілікті нақты іс-әрекеттер арқылы көрсететін белсенді патриотизмді қалыптастыру.
Акция барысында қатысушылар Бутаковка шатқалындағы өзен арнасын және оған іргелес аумақтарды тазарту жұмыстарын жүргізді. Эколог әрі эко-белсенді Марина Яцунның жетекшілігімен еріктілер далалық жағдайда қалдықтарды дұрыс сұрыптау дағдыларын меңгерді.
«Бұлақ көрсең, көзін аш» акциясының атауы суды қорғау мен ұқыпты пайдаланудың маңыздылығын, оның тіршілік көзі әрі мәдени мұраның ажырамас бөлігі екенін айқындайды.
«Алматы табиғаты – баршамызға ортақ құндылық. Бүгінгі акция жастардың экологиялық өзгерістердің қозғаушы күші болуға дайын екенін көрсетті. Таулар мен тау бөктерінің тазалығы – бұл тек әсемдік емес, сонымен қатар мәдениетіміз бен туған жерге деген құрметіміздің көрсеткіші», – деп атап өтті ұйымдастырушылар.
«Almaty – менің мақтанышым» жобасы қоғамдық келісімді нығайтуға, жасампаздық құндылықтарды ілгерілетуге және қала тұрғындарын мәдени-әлеуметтік өмірге белсенді тартуға бағытталған іс-шаралар сериясын жалғастыруда.
Жоба жеткізушісі: «ALEM INNOVATION» ЖК
#AlmatyMeninMaqtanyshym #ЖерКүні #АлматыныңТабиғаты #TazaQala #ТазаҚазақстан #EcoAlmaty