Түркіменстанның бұрынғы президенті Гурбангулы Бердімұхамедовтың үлкен қызы Огулжахан Атабаева әкесінің атымен аталған қайырымдылық қорының емдеу қызметі бойынша вице-президенті болып тағайындалды, деп хабарлайды aqshamnews.kz Turkmen.news. сілтеме жасап.
Аталған қор көмекке мұқтаж балаларға қолдау көрсетумен айналысады. Бұл шешім 7 желтоқсанда Аркадаг қаласында өткен қор басқармасының отырысында қабылданды.
Бұған дейін Огулжахан Атабаева мен оның жұбайы Довлет Атабаев Ұлыбританияда тұрған. Атабаев Лондонда Түркіменстан елшілігінің кеңесшісі болып қызмет атқарған. 2019 жылы ерлі-зайыптылар күлкілі жағдайға тап болды: жергілікті велосипедші Атабаевтың көлік жүргізіп отырып телефон қолданғанын видеоға түсіріп, ескерту жасаған еді.
Қазір ерлі-зайыптылар Түркіменстанға оралды. БАҚ мәліметінше, Атабаев формалды түрде Мемлекеттік құрылыс комитетінің төрағасының кеңесшісі ретінде тіркелгенімен, шын мәнінде Аркадаг қаласындағы медициналық нысандарды қадағалайды.
Айта кетейік, Аркадаг – Түркіменстанның негізгі жобаларының бірі, онда Бердімұхамедовтар отбасы белсенді түрде атсалысуда. Атабаеваның тағайындалуы бұл әулеттің елдегі ықпалы әлі де айтарлықтай екенін көрсетеді.