Жамбыл облысында кәмелетке толмаған балаға қатысты күш қолдану дерегі бойынша сотқа дейінгі тергеу басталып, күдікті әйел ата-ана құқығынан айырылуы мүмкін, деп хабарлайды Aqshamnews.kz тілшісі.
Балалардың құқықтарын қорғау комитетінің мәліметінше, оқиғаға байланысты сот-медициналық сараптама тағайындалған. Балалар уақытша балалар үйіне орналастырылып, қауіпсіздігі қамтамасыз етілген. Қазір оларға медициналық көмек көрсетіліп, жағдайы дәрігерлердің бақылауында екені айтылды.
Комитет балаларға қатысты қатыгездікке тиісті құқықтық баға беріліп, кінәлі тұлғалар заң аясында жауапкершілікке тартылатынын мәлімдеді. Ата-ана құқығынан айыру мәселесі Кәмелетке толмағандар істері және олардың құқықтарын қорғау жөніндегі комиссияда қаралады.
Полиция ҚР Қылмыстық кодексінің 140-бабы 2-бөлігі бойынша тергеу амалдарын бастаған. Ведомство әйел адамның оқиғаның барлық мән-жайын анықтауға бағытталған тергеу әрекеттері үшін полиция бөліміне жеткізілгенін, сараптама мен тергеу қорытындысына сай процессуалдық шешім қабылданатынын хабарлады.