Мәжіліс төрағасы Ерлан Қошанов бүгін елордадағы №163 референдум учаскесінде дауыс берді.
Палата спикері «Қазақстан темір жолы» ғимаратындағы сайлау учаскесіне келіп, елорда тұрғындарымен бірге атом электр станциясын салу мәселесі бойынша республикалық референдумда өз таңдауын жасады.
«Бүгінгі референдум еліміз үшін маңызды күн, сондықтан ерекше көңіл-күйдемін. Бұл – мемлекетіміздің болашағына қатысты маңызды шешім қабылданатын күн. Ең бастысы, осы шешімді халық өзі қабылдап жатыр. Бұған дейін қабылданған Конституциялық реформа арқылы әр азаматтың мемлекет саясатына белсене араласуына мүмкіндік жасалды. Бүгін осының нақты көрінісін көріп отырмыз. Барлық өңірлерде азаматтарымыз өз дауыстарын беруде. Әр аймақтан келіп жатқан ақпараттарға қарағанда, халықтың белсенділігі өте жоғары. Мемлекетіміздің болашағы үшін халық дұрыс шешім қабылдайтынына сенімдімін», - деді Мәжіліс төрағасы.