Ата-аналарымен бірге өткізген бұл күн балаларға ерекше көңіл-күй сыйлады, деп хабарлайды aqshamnews.kz тілшісі.
Батыс Қазақстан облысы полиция департаментінде Отбасы күніне орай полицияда қызмет ететін ерлі-зайыпты жұптар мен олардың балаларының қатысуымен “Бір қызмет. Бір шаңырақ” атты танымдық шара ұйымдастырылды.
Қызметте де, өмірде де бір-біріне серік болған полиция жұптары бұл күні балаларымен бірге сайыстарға қатысты. Шара барысында бүлдіршіндер шахмат пен шашкадан сынға түсіп, сурет салып, түрлі бояулар әлеміне саяхат жасады.
Сонымен қатар LED экран арқылы мультфильм кейіпкерлерін тауып, мақал-мәтелдерді ребус арқылы шешіп, логикалық тапсырмаларда білімдері мен тапқырлықтарын байқатты. Ата-аналарымен бірге өткізген бұл күн балаларға ерекше көңіл-күй сыйлады.
Сайыс қорытындысы бойынша кішкентай қатысушылар “Үздік шахматшы”, “Шебер суретші”, “Білімді бүлдіршін” және өзге де аталымдармен марапатталды. Әрбір балаға алғыс хаттар мен тәтті сыйлықтар табысталды.
Бұл шара ортақ мамандық иелерін бір шаңырақ астына біріктіріп, отбасы құндылықтары мен ата-ана мен бала арасындағы байланысты дәріптеген әсерлі кездесу болды.