Respublica партиясы АЭС құрылысы бойынша референдум қарсаңында азаматтардың пікірін еркін және ашық білдіру үшін жағдай жасауға, сондай-ақ барлық қазақстандықтардың көзқарастарын адал және объективті түрде ескеру қажеттігін атап өтті, деп хабарлайды aqshamnews.kz
Партия бұл туралы арнайы мәлімдеме жасады.
«Индустрияландыру мен технологиялық прогресске ұмтылу барысында адамзат дәстүрлі энергия көздерін – мұнай, көмір және газды пайдаланудың климаттық өзгерістерге және экологиялық жағдайдың нашарлауына әкелгенін байқамай қалды. Қазақстанның бұл ресурстарға бай екеніне қарамастан, оларды әрі қарай пайдалану жеріміз үшін ауыр салдарға соқтыруы мүмкін», – делінген партия мәлімдемесінде.
Сондай-ақ, энергия тапшылығы артып келе жатқан жағдайда елге сенімді және экологиялық таза энергия көздері қажет екені атап өтілді.
«Атом энергетикасы біздің экономикамыздың қажеттіліктерін қанағаттандыруда маңызды рөл атқаруы мүмкін. Мемлекет басшысы ағымдағы жылдың 2 қыркүйегінде Қазақстан халқына Жолдауында атап өткендей, біз тез өсіп келе жатқан қажеттіліктерді қанағаттандыру үшін атом энергетикасын дамытуға назар аударуымыз керек. Дегенмен, прогресс жолында тарихи қорқыныштарға негізделген атомофобия тұр. Бүгінгі заманауи технологиялар атом энергетикасының қауіпсіздігін жоғары деңгейде қамтамасыз етеді. Бұл қорқыныштарды жеңіп, ертеңгі күнге сеніммен қарау маңызды. Болашақ – жасыл энергетикада, соның ішінде атом энергетикасында», – деп мәлімдеді партия өкілдері.
Партия штабының отырысында АЭС құрылысының негізгі аспектілері, соның ішінде ғылымды дамыту және жұмыс орындарын құру мәселелері талқыланды.
«Жоба жаңа жұмыс орындарын ашып, ғылыми зерттеулерді ынталандырып, қосымша инвестиция тартуға ықпал етеді. Сонымен қатар, атом энергетикасын дамыту салық түсімдерінің артуына және инфрақұрылымның жақсаруына әкеліп, елдің әлеуметтік-экономикалық жағдайына оң әсерін тигізеді», – деп атап өтті партия өкілдері.