Соңғы уақытта әлеуметтік желілер мен хабарландыру платформаларында зейнетақы жинақтарын алу бойынша делдалдық қызметтерді ұсынатын жарнамалар саны көбейіп кетті. Бұл жарнамаларда азаматтарға зейнетақы жинақтарын ең төменгі жеткіліктілік шегінен (ТЖШ) асқан жағдайда төмен пайызбен рәсімдеп беруге уәде етілуде, деп хабарлайды aqshamnews.kz
Осыған байланысты, «Бірыңғай жинақтаушы зейнетақы қоры» (БЖЗҚ) Қазақстан азаматтарын мұндай күмәнді делдалдық қызметтерден сақ болуға шақырады. БЖЗҚ мәліметінше, зейнетақы жинақтарын пайдалану ҚР Әлеуметтік кодексінде қатаң белгіленген жағдайда ғана рұқсат етіледі. Олар:
- Зейнет жасына толу;
- 1 немесе 2 топтағы мерзімсіз мүгедектік;
- Шетелге тұрақты тұруға кету;
- Мұрагерлік құқық арқылы.
Сонымен қатар, зейнетақы жинақтарын тұрғын үй жағдайларын жақсарту немесе емделу мақсатында пайдалану тек арнайы уәкілетті операторлар арқылы, яғни екінші деңгейлі банктер арқылы жүзеге асады. Бұл қызметтерге ешқандай делдалдық қажет емес, ал БЖЗҚ бұл процестер үшін қосымша ақы алмайтынын хабарлайды.
БЖЗҚ азаматтарды ешбір делдалдарға ақша төлемей, заңды және ресми жолмен өз зейнетақы жинақтарын пайдалану мәселесін шешуге шақырады.