Алматыда өтіп жатқан референдумда елінің ертеңіне алаңдаған қазыналы қарттарымыз белсенділік танытуда. Солардың бірі – ҚазҰУ профессоры, 91 жастағы Кеңес Биекенов атамыз да саяси науқанға қатысып, өз таңдауын жасап, дауыс берді.
– Бүгін біз маңызды міндеттерді жүзеге асырып, мемлекеттің тұрақты дамуын қамтамасыз етеді деген үмітпен өз таңдауымызды жасап жатырмыз. Бұл қадам әрбір азаматтың ел болашағына деген жауапкершілігін көрсетеді. Ел игілігі жолындағы ортақ жұмысымыз сәтті болғай! – дейді Кеңес ата.
Кеңес Биекенов өмір бойы білім саласында қызмет етіп, талай шәкірт тәрбиелеген. Елге деген адалдығы мен жауапкершілігін бүгінгі таңда да дәлелдеп отыр. Ол бүгінгі референдумның ел болашағы үшін маңызы зор екенін атап өтіп, барша қазақстандықтарды белсенділікке шақырды.
– Біз болашақ ұрпақтың бақыты үшін дауыс берудеміз. Әрбір дауыстың маңызы бар, сондықтан барлық азамат өз таңдауын жасауға міндетті. Мемлекетіміздің болашағы біздің бүгінгі қадамымызға байланысты, – деп сөзін түйіндеді Кеңес ата.
Алматы қаласында өтіп жатқан бұл саяси науқанға түрлі жастағы тұрғындар белсенді қатысып, өз азаматтық борыштарын орындауда. Еліміздің дамуы мен тұрақтылығы үшін әрбір қазақстандықтың үлес қосуы маңызды, және бұл күні қала тұрғындары осы жауапкершілікті сезініп, өз таңдауын жасауға асығуда.