«Шектеусіз инновация: тұрақты дамып келе жатқан Алатау қаласы» форумының ашылу салтанаты өтті.
Онда ҚР Өнеркәсіп және құрылыс министрі Қанат Шарлапаев сөз сөйледі, деп хабарлайды aqshamnews.kz.
Биыл Қазақстан мен Корея Республикасы 30 жылдан астам жемісті қарым-қатынастарды атап өтеді және өнеркәсіп пен жоғары технологиялар саласындағы ынтымақтастықты дамытуды жалғастыруда.
«Бүгінде елдеріміз арасындағы өндірістік кооперация экономикалық дамудың қуатты қозғалтқышы. Біз жалпы құны 3,8 млрд доллар болатын 20 бірлескен инвестициялық жобаны жүзеге асырып жатырмыз, бұл 10 мыңнан астам жұмыс орнын құруға мүмкіндік береді. Ынтымақтастығымыздың маңызды мысалы – машина жасау саласы», – деді Қанат Шарлапаев.
Сәтті ынтымақтастықтың маңызды мысалдарының бірі машина жасау саласындағы бірлескен жобалар. Қазақстанда KIA автомобильдерін шығаратын зауыт, «Астана Моторс» және «Hyundai Motor Company», жолаушылар вагондарын, «Hyundai» жүк көліктері мен автобустарын шығаратын зауыттар табысты жұмыс істейді.
Министр Корея Республикасымен сауда-экономикалық қарым-қатынастар одан әрі дамып келе жатқанын атап өтті. Өткен жылы тауар айналымы 6 млрд долларды құраса, Қазақстанның Кореяға экспорты мұнай, феррохром және титан құймаларын қосқанда 3,8 млрд долларды құрады. Бұл ретте Кореядан импорт 2,2 млрд долларға жетті, оның негізгі тауарлары машиналар, жабдықтар және тұрмыстық техника болды.
Форумның негізгі бөлігі «Алатау индустриалды паркінің брендинг стратегиясы және негізгі нысандарды тартудың жол картасы» презентациясы болды. KPMG атқарушы директоры Мун Гу Пак мырза аталмыш жобаны жүзеге асырудың негізгі бағыттары туралы айтты.
2024 жылы құрылған «Алатау» АЭА 96 560 гектар аумақты алып жатыр. Бұл қағаз өнімдерін өндіру, тоқыма өндірісі, тұрғын және тұрғын емес үй-жайларды салу сияқты басым салаларға инвестиция тартуға бағытталған елдегі ең ірі аймақтардың бірі.
«Бұл аймақтың маңызды мақсаты – жоғары технологиялы өндірістерге баса назар аудара отырып, заманауи және бәсекеге қабілетті өндіріс құру және өңірде жұмыспен қамтуды арттыру. «Алатау» АЭА тартылған инвестициялар мен жүзеге асырылып жатқан жобалардың арқасында мыңдаған жұмыс орындарын ашып, өнеркәсіптік өсудің маңызды қозғаушы күшіне айнала алады деп күтілуде», – атап өтті Қанат Шарлапаев.
Қазақстан ұзақ мерзімді ынтымақтастықты дамыту және бірлескен жобаларды жүзеге асыру мақсатында оңтүстік кореялық компанияларға бірқатар жеңілдіктер ұсынып отырғанын ерекше атап өткен жөн. Атап айтқанда, Өнеркәсіпті дамыту қоры арқылы жеңілдетілген несиелендіру, салықтық жеңілдіктер, оның ішінде Қазақстанда өндірілетін өнімдерді ҚҚС төлеуден босату, сондай-ақ жаңадан ашылған кәсіпорындарды алғашқы үш жылда салық төлеуден босату. Бұл шаралар тартымды бизнес-ортаны құруға және тікелей шетел инвестицияларының ағынын ынталандыруға бағытталған.