TIME журналы 2024 жылдың «Жыл адамы» атағына үміткерлердің тізімін жариялады. Тізімге биылғы жылы әлемге ерекше ықпал еткен тұлғалар кірді. Бұл атақ 1927 жылдан бері беріледі және ол адамның, топтың немесе идеяның өткен 12 айдағы әлемге әсерін айқындайды. Бұл ықпалдың оң немесе теріс болуы маңызды емес.
Үміткерлер тізімі:
- Камала Харрис – АҚШ-тың вице-президенті және 2024 жылғы президенттік сайлауда Демократиялық партияның кандидаты.
- Илон Маск – Tesla мен SpaceX бас директоры, әлемдегі ең бай адам.
- Дональд Трамп – АҚШ-тың 47-ші президенті.
- Кейт Миддлтон – Уэльс ханшайымы, биыл оған қатерлі ісік диагнозы қойылған.
- Биньямин Нетаньяху – Израиль премьер-министрі.
- Юлия Навальная – Ресейлік оппозиционер Алексей Навальныйдың жесірі.
- Джером Пауэлл – АҚШ Федералды резерв жүйесінің төрағасы.
- Джо Роган – АҚШ-тағы ең танымал подкаст жүргізушісі әрі комик.
- Марк Цукерберг – Meta компаниясының бас директоры.
- Клаудия Шейнбаум – Мексиканың алғашқы әйел-президенті.
TIME журналы әлемдегі саясат, экономика, мәдениет және технология сынды маңызды бағыттарға ықпалын тигізген тұлғаларды қамтыды.
2023 жылы бұл атақты әйгілі әнші Тейлор Свифт жеңіп алған болатын. 2024 жылдың жеңімпазы 12 желтоқсан күні белгілі болады.
TIME журналының «Жыл адамы» – жаһандық өзгерістер мен ықпалдың символы. Кімнің таңдалатыны бүкіл әлем үшін қызықты жаңалық болмақ.