Биыл Алматы әуежайы жолаушылар ағынын 8 млн-ға дейін ұлғайтуды жоспарлап отыр. Сол себепті әуежай аумағында кезектер мен кептелістер болуы мүмкін, деп хабарлайды almaty-akshamy.kz Алматы халықаралық әуежайы корпоративтік коммуникациялар департаментіне сілтеме жасап.
Әуежайдың мәліметінше, туристердің қажеттіліктерін қанағаттандыру үшін жазғы демалыс және каникул уақытында рейстердің ұлғаюына байланысты Алматы халықаралық әуежайында жолаушылар мен қала қонақтарының күрт өсуі байқалады.
Бүгінгі таңда қолданыстағы әуежай терминалының өткізу қабілеті жылына 2,7 млн адамды құрайды. Сондай-ақ өткен жылы Алматы халықаралық әуежайы 7,2 млн-нан астам жолаушыны қабылдаса, биыл жолаушылар ағынын 8 млн дейін ұлғайтуды жоспарлап отыр.
«Осы кезеңде Алматы Халықаралық әуежайының аумағында қосымша кезектер мен кептелістер байқалуы мүмкін. Біз өткізу қабілеті 8 млн адамды құрайтын және қаламыздың тұрғындары мен қонақтарына қажетті жайлылық пен ыңғайлылықты қамтамасыз ететін жаңа Халықаралық жолаушылар терминалының құрылысын тезірек аяқтау үшін бар күшімізді саламыз», - деп хабарлады әуежайдың корпоративтік коммуникациялар департаменті.