Бүгін Alatau aqparat медиахолдингіне Алматы мәслихатының мәдениет, спорт, ішкі саясат, дін және жастар мәселелері жөніндегі комиссия өкілдері арнайы келіп, басылымдар мен сайттардың жұмыс барысымен танысты, - деп хабарлайды aqshamnews.kz тілшісі.
Депутаттар редакциялық процестерді көріп, әлеуметтік желіні жүргізіп отырған жастармен пікірлесіп, кеңестерін ортаға салды.
Комиссия төрағасы Бейбіт Құсайынов, төраға орынбасары Серік Есматов, сондай-ақ, Еркінбек Рақышев пен Дулат Рамазанов медиахолдинг құрамындағы «Алматы ақшамы», «Вечерний Алматы» газеттерінің редакцияларымен, сондай-ақ Aqshamnews.kz, Vecher.kz, Alnews.kz ақпараттық сайттарының күнделікті жаңалық өндіру жүйесімен танысты. Alatau aqparat медиахолдингі басшысы Ержан Қалымбайұлы ресурстарды заманға сай бейімдеуге қатысты жүргізіліп жатқан трансформациялармен таныстырды.
Кездесу барысында комиссия мүшелері ұжыммен тілдесіп, медианың қоғаммен байланыс орнатудағы рөлі, қалалық күн тәртібін ақпараттық сүйемелдеу және жастар аудиториясымен жұмыс жүргізудің тиімді жолдары төңірегінде ой бөлісті. Биыл шыққанына 90 жыл болған «Вечерний Алматы» және «Алматы Ақшамы» газеті мен әлеуметтік желі, сайт редакциясында болып сөйлесті. Диджитал платформаларға контент әзірлейтін жас мамандардың жұмысына да назар аударып, контенттің сапасын арттыру, аудиториямен кері байланысты күшейту секілді маңызды бағыттар бойынша пікір алмасты.
Сапар аясында қонақтар медиахолдингтің мұражайын аралап, басылымдар тарихы мен редакцияның дәстүрлі мектебіне қатысты құнды деректермен танысты. Сонымен қатар, жақында іске қосылған подкаст студияны тамашалап, қазіргі медиатрендтерге сай мультимедиалық жобалардың маңызына тоқталды.
Депутаттар тарихи бай медиа орталықтың жұмыстарын тұрақты қолдап келе жатқандарын айтып, медиахолдинг ұжымына шығармашылық табыс тілеп, қала тұрғындарын сапалы әрі жедел ақпаратпен қамту бағытындағы жұмыстың өзекті екенін атап өтті.