Екібастұз қаласында 17 жастағы жасөспірім ұл мен қыздың қайтыс болуына байланысты қылмыстық істер қозғалып, тергеу амалдары басталды, деп хабарлайды Aqshamnews.kz тілшісі.
Павлодар облыстық полиция департаментінің мәліметінше, әрбір оқиға жеке-жеке қаралып жатыр. Тергеу барысында жасөспірімдердің мұндай қадамға баруына не себеп болғаны және оқиғаның барлық мән-жайы анықталуда. Қайғылы жағдайлар әртүрлі уақытта тіркелгенімен, марқұмдардың бір-бірімен бұрыннан таныс болғаны белгілі болды.
Павлодар облысының бала құқықтары жөніндегі өңірлік уәкілі Сауле Шакеневаның айтуынша, жасөспірімдер 2008 жылы туған, әлеуметтік жағдайы жақсы, толық отбасыларда тәрбиеленген. Ұл бала Екібастұз қаласындағы мектептердің бірінде 11-сыныпта оқыған, ал қыз жергілікті колледждің бірінші курс студенті болған.
Алдын ала мәліметтерге сәйкес, әрқайсысы өз үйлерінде қайтыс болған. Оларды жақын туыстары тауып алған. Уәкілдің айтуынша, жасөспірімдер бұрын бір сыныпта оқып, достық қарым-қатынаста болған.
Оқу орындарында буллинг деректері тіркелмеген, сондай-ақ олар психологтардың бақылауында болмаған және арнайы есепте тұрмаған. Әлеуметтік желілерде тараған ақпаратқа сәйкес, қыз баланың өлімі жасөспірім ұлдың қазасынан екі күн өткен соң болған.
Қазіргі уақытта оқиғаға қатысты тергеу жұмыстары жалғасып жатыр.