Күн жылынып, төңірек түгел жасыл көйлегін киініп, өрік, алма ағаштары гүл атқанда сізді таңғы ұйқыдан құстардың сазды әні оятады. Сиқыр үн жүрек сандығын ақтарып, көңіліңіздің терезесін сағыныш сазын қағып, сан құбылтып салған құстар әні сүйсіндірмей қоймайды. «Ақ тырналар аспанды боздатады. Сұқсыр көкек тоғайдан сұңқылдаса, Қай-қайдағы мұңымды қозғатады», – деп ақын Мұқағали Мақатаев жырлағандай, жыл мезгілінің ғажабы – көктемнің қанатына ілесе, жыл құстары керуен көшін бастап,жылы жақтан қайта оралуда
«Көк құрақ – көлдің сәулеті, құс пен аң – елдің дәулеті» дейді дана халқымыз. Осы орайда, Алматы қаласында өтіп жатқан «Алматы- біздің ортақ үй»атты акцияға Жетісу ауданы №108 жалпы білім беретін мектеп оқушылары да белсене қатысып, өз қиялдарына ерік беріп, түрлі ұяшықтар жасап жарысуда. Мұндай іс-шаралар әрбір оқушының жүрегіне қамқорлық сезімін оятып қана қоймай, тылсым табиғаттың көркін ашатын құстардың қасиетін бойларына дарытуда. Осындай ұйымдастырылған іс-шаралар арқылы жасөспірімдерге үздіксіз экологиялық білім мен тәрбие беріп отырсақ, деніміз сау, болашағымыз жарқын болары хақ.