Иран соты блогер Хусейн Шанбехзадеге 12 жылға бас бостандығынан айыру жазасын тағайындады. Блогер маусым айында Жоғарғы көшбасшы Әли Хаменеидің твитіне жауап ретінде бір ғана нүкте қойғаны үшін тұтқындалған, деп хабарлайды aqshamnews.kz iranintl.com сайтына сілтеме жасап.
Шанбехзаде мамыр айында жазбаға нүкте қалдырып, еш зиянсыз көрінетін әрекет жасады. Алайда бірнеше аптадан кейін оның пікіріне Хаменеидің бастапқы твитінен көп лайк жиналып, биліктің назарын аудартты. Ол біраз уақыттан кейін ұсталып, шілде айында уақытша қамау мерзімі тағы бір айға ұзартылды.
31 тамызда адвокаты блогерге жалған айыптар тағылып, 12 жылға сотталғанын мәлімдеді. Бұл айыптар Иран соты тарапынан белсенділерді ұзақ уақыт бойы қамауда ұстау үшін және өзгелерді қорқыту мақсатында жиі қолданылатын айыптар.
Блогерге «Израильді қолдаған насихат әрекеті» үшін бес жыл, «Исламдық қасиетті орындарды қорлағаны» үшін төрт жыл, «Әлеуметтік желілерде жалған ақпарат таратқаны» үшін екі жыл және «Режимге қарсы насихат жүргізгені» үшін бір жыл жаза тағайындалды, деп хабарлады оның адвокаты Әмір Раисиан.
Раисианның айтуынша, сот «Израильді қолдаған насихат әрекетіне» қатысты дәлел келтірмеген. Бұл айыптар блогердің жеке хат-хабарларына негізделген.
Адвокат блогердің басқа айыптары оның саяси тұтқындарды қолдағаны, елдегі жағдайды сынға алғаны және міндетті хиджабты алып тастауға қолдау білдіргені үшін тағылғанын айтты.