Бұл шараны FIDE – Халықаралық шахмат федерациясы мен Қазақстан шахмат федерациясы бірлесіп ұйымдастырды.
Конференцияның мақсаты — шахматты білім беру жүйесіне енгізу, оның әдістемелік, педагогикалық және стратегиялық аспектілерін талқылау. Жиынға халықаралық және қазақстандық сарапшылар, шетелдік шахмат федерацияларының төрағалары мен шахмат мамандары қатысып отыр.
Білім берудегі шахмат бойынша FIDЕ комиссиясының төрағасы Джерри Нэш тәжірибесін бөлісу үшін Алматыға арнайы келіп, конференцияға қатысты.
“Мен Алматыға алғаш рет осыдан 34 жыл бұрын келген едім. Ол кезде халықаралық алмасу бағдарламасы аясында келдім. Бұл шаһар маған жат емес. Қайта келгеніме қуаныштымын. Қазақстанның осы саладағы бастамаларын қолдау үшін келдім. Қазіргі уақытта Алматыдағы Балуан Шолақ спорт кешенінде шахматтан кадеттер арасында әлем чемпионаты өтіп жатыр.
FIDE‑нің «Шахмат және білім беру» жөніндегі комиссиясы Қазақстанды үнемі қолдап келеді. Өйткені, бұл ел шахматты білім беру саласына жүйелі түрде енгізіп жатыр. Сол арқылы біз балалардың коммуникативтік дағдыларын, ойлау қабілетін және интеллектуалдық әлеуеттін дамыта аламыз.
Қазақстандық мектептерге шахмат пәнін енгізу бағдарламасы бірте-бірте іске асырылып жатыр. Бұл бастама өзге елдерге де үлгі болары анық”, - дейді Джерри Нэш.
Қазіргі таңда әлем елдері де шахматты білім беру жүйесіне енгізіп жатыр. Мысалы, Швейцарияда бастауыш сыныптардың оқу бағдарламасына енгізілсе, Швецияда шахмат қосымша пән ретінде мектептерде кеңінен қолданылып келеді. Испанияның Каталония өңірінде 2012 жылдан бастап шахмат ресми түрде білім беру құралы ретінде оқытылып жатыр. Ал Малайзия 2025 жылы шахматты ұлттық деңгейде мектеп бағдарламасына енгізді. АҚШ-та шахмат тек мектептерде ғана емес, жоғары оқу орындарында да оқытылады.
Халықаралық сарапшылардың пікірінше, шахматты білім беру жүйесіне енгізу – оқушылардың сыни ойлауын, шешім қабылдау қабілетін дамытуға зор мүмкіндік береді. Сонымен қатар, бұл бастама келешекте интеллектуалды ұлт қалыптастыруға негіз бола алады.
Дәрмен СӘДУАҚАСОВ, Қазақстан шахмат федерациясының вице-президенті:
Шахмат – спорт түрі ғана емес, интеллектуалды даму мен тәрбие құралы ретінде де маңызға ие. Осыдан үш жыл бұрын Қазақстанда шахмат бағдарламасы 40 мектепке ғана енгізіліп, шамамен, 1000 бала оқыды. Ал қазір бұл көрсеткіш едәуір өсті. Шахмат бағдарламасы 1500 мектепті қамтиды және оның аясында шамамен, 60 мың оқушы білім алуда. Сондықтан осындай халықаралық және ұлттық деңгейдегі конференциялар мен пікір алмасу алаңдарының мәні зор.