Бас прокуратура ел аумағында интернет-алаяқтықтың күшейгені туралы шұғыл мәлімдеме жасады, деп хабарлайды Aqshamnews.kz тілшісі.
Қазір қаскөйлер азаматтарды алдау үшін танымал тұлғалардың дауысы мен бейнесін қолдана бастаған.
Қадағалау органының мәліметінше, алаяқтар бұрын ірі ұлттық компаниялардың атын жамылса, енді екінші деңгейлі банктер мен құрылыс ұйымдарының атынан жалған инвестициялық платформалар ашуға көшкен.
Қолданылып жатқан тәсілдер:
– Deepfake технологиясы арқылы белгілі адамдардың бейнесі мен дауысын пайдаланып, жалған жобаларды жарнамалау;
– Бұрын қаржысынан айырылған азаматтарға «ақшаңызды қайтарып береміз» деп сендіріп, қайта алдау;
– Жеке деректерді иемдену үшін күмәнді сілтемелер тарату.
Прокуратура өкілдері азаматтарға сақ болуға кеңес береді. Атап айтқанда, бейтаныс сілтемелерді ашпау, жеке және банк деректерін ешкімге бермеу, жылдам әрі мол табыс уәде еткен жарнамаларға сенбеу және кез келген инвестициялық ұсынысты ресми дереккөздер арқылы тексеру қажет.
Егер алаяқтық дерегіне тап болсаңыз, құқық қорғау органдарына дереу хабарласу ұсынылады.