Жапониядағы бір аквариумда қызықты оқиға орын алды. Мұндағы 28 килограммдық ай балық (рыба-луна) адамдардың жоқтығынан депрессияға ұшыраған, деп хабарлайды Aqshamnews.kz.
Аквариумда жөндеу жұмыстары басталған кезде балық өзін жайсыз сезініп, ас жемей қойған. Ол әйнекті жағалап жүріп алған.
Балықтың көңіл-күйін жақсарту үшін қызметкерлер ерекше қадамға барады. Олар аквариумға қаратып картоннан жасалған адамдарды орнатып қояды.
Жасанды адамдар орнатылғаннан кейін, балықтың тәбеті ашылып, бұрынғыдай көңілді әрі белсенді күйге енеді.
Бұл оқиға адамдар мен жануарлар арасындағы ерекше байланысты тағы бір дәлелдегендей. Ай балыққа адамдардың келіп тұруы, тіпті олардың жасанды бейнесінің өзі де, психологиялық қолдау болғаны анық.