Алматы қаласы бойынша Қылмыстық-атқару жүйесі департаментіне қарасты №11 мекемеде шағын футболдан жолдастық кездесу өтті.
Аталған мекемеде, нақтырақ айтсақ, балалар колониясында спорт десе ішкен асын жерге қоятын жасөспірім өте көп. Бұрын теңбіл доп сайысы түзеу мекемесіндегі балалар мен қаладағы колледж студенттерінен құралған командалар арасында ұйымдастырылатын.
Бұл жолы жасыл алаңға жазасын өтеп жатқан жасөспірімдермен бірге, Алматы орталық мешітінің, «Әбу-Бәкір» және «Исмихан» мешіттерінің имамдарынан жасақталған команда шықты. №11 мекеме командасы мен «Мешіт имамдарының» футбол командасы арасында ойын тартысты да қызықты өтті. Есеп – 10:6. Түзеу мекемесінің тәрбиеленушілерінің тобы жеңіске жетті. Жеңімпаз балаларға Алматы қаласының бас имамы Оспан Дәділұлы бастаған имамдар спорттық аяқ киімдер, теңбіл доптар тарту етті.
– Мұндай спорттық іс-шараның мақсаты – жасөспірімдердің денсаулығын нығайтуға дәнекер болу, оларға салауатты өмір салтының пайдасын насихаттау және сыртқы ортамен байланысын үзіп алмауға жағдай жасау, – дейді тәрбие бөлімінің бастығы әділет подполковнигі Алма Бәзілбаева.