Қылмыс жасап сотталған адамдарды жұмыспен қамту да күн тәртібінен түспеген мәселе. Жазасын өтеп жатқандар да бос отырмай, кәсіппен айналысуға тиіс. Түзеу мекемелерінің аумағында шағын өндіріс орындарын ашу, міне, осы түйінін шешуге айтарлықтай ықпал етуде.
ҚР Ішкі істер министрлігі Қылмыстық-атқару жүйесі комитетіне қарасты №11 мекемесіндегі бос ғимараттардың бірінде «Azeris» жиһаз цехы ашылды. Ашылу рәсіміне Алматы қаласы, Алматы және Жетісу облыстары бойынша Қылмыстық-атқару жүйесі департаментінің сотталғандардың еңбегін ұйымдастыру бөлімінің инспекторы әділет подполковнигі Ерік Райымқұлов, «Атамекен» кәсіпкерлер палатасының бизнесті қорғау және әкімшілік тосқауылдарды төмендету бөлімінің басшысы Еркебұлан Беймбет және мекеме бастығы әділет подполковнигі Мирас Толубаев қатысты.
– «Azeris» жиһаз жасап шығаратын цехына жазасын өтеп жатқан 8 жасөспірім жұмысқа тұрды. Оларға еңбекақы төленеді. Жазалы жасөспірімдер аталған цехта зор ынтамен жұмыс істеуде. Бір жағынан қазір сұранысқа ие жиһаз жасау кәсібін меңгерсе, екінші жағынан табыс тауып, сотпен белгіленген шығындарын өтеуге және аз да болса ата-аналары мен бауырларына қаржылай көмек беруге мүмкіндік туғанына қуанышты. Сонымен қатар, еңбекке араласа жүріп шеберліктерін шыңдайды. Бостандыққа шыққан соң кәсібі бойынша жұмысқа орналаса алады, – дейді №11 мекеменің сотталғандардың еңбегін ұйымдастыру тобының аға инспекторы әділет капитаны Толунай Низамова.