Алматы қаласының ҚАЖ департаментіне қарасты №11 мекемесінде кәмелетке толмаған жазасын өтеуші жасөпірімдер де 1 мамыр — Қазақстан халқының бірлігі күнін атап өтті.
— Басты мақсат —жасөспірімдерге көп ұлтты құшағына басқан егемен еліміздегі халықтар достығын, бірлік, татулықты, бейбіт өмірдің қадірін дәріптеу. Оларды әр халықтың өнерін, салт-дәстүрін де құрметтей білуге шақыру, біздің Қазақстан мемлекетінің ізгілікті дәріптейтін биік мақсаттағы ел екенін жеткізу, — дейді балалар колониясының тәрбие ісі жөніндегі маманы Еркегүл Жеңісхан.
Мерекелік іс-шараға жазасын өтеп жатқан жасөпірімдер белсенді қатысты. Елімізде өмір сүріп жатқан түрлі этностың ұлттық киімін киіп, ән салып, би биледі. Осынау шағын ғана мәдени, рухани іс-шараның өзі жазасын өтеп жатқан жеткіншектердің санасына ой салары сөзсіз.