Қазақстанның Әзербайжандағы Елшілігінде Бакуда тұратын Қазақстан азаматтары мен қазақ білімгерлерінің басқосуы өтті, деп хабарлайды aqshamnews.kz
Қазақстан Республикасының Әзербайжандағы Елшісі Әлім Байел өз сөзінде еліміздің Тәуелсіздік кезеңіндегі жетістіктеріне тоқталып, мемлекеттің сыртқы және ішкі саясатының негізгі бағыттары туралы айтып берді.
Дипломат Қазақстанның Әзербайжанмен саяси, экономикалық, көлік-логистикалық, қорғаныс, білім, мәдени және туристтік салалардағы ынтымақтастығының оң динамикасын атап өтті. Қазақстан мен Әзербайжан іске асырып жатқан ірі өңірлік жобалардың маңыздылығына назар аударды. Олардың арасында Орта дәлізді дамыту, Каспий теңізі арқылы интернет желісін және электрокабельді тарту бар.
Елші 2023 жылғы қараша мен 2024 жылғы қараша аралығында Мемлекет басшысы Қасым-Жомарт Тоқаевтың Әзербайжанға сапармен төрт рет келгенін, мұндай қарқынның екіжақты қарым-қатынастарымыздың тарихында бұрын болмағанын атап өтті. Сонымен қатар, Ә.Байел Қазақстанның басты байлығы оның азаматтары екенін және Елшіліктің қазақстандықтар үшін әрдайым ашық екендігін айтты.
Іс-шара аясында Әзербайжанның жетекші жоғары оқу орындарында оқитын студенттер «Орда» қазақ жастарының ұйымын құрды. Ұйымның мақсаты Әзербайжандағы қазақ студенттерін біріктіру және қолдау, мәдени байланыстарды нығайту мен түрлі іс-шаралар өткізу болмақ.
Осы тұрғыда Елші Ә.Байел Алтын Орданың 800-жылдығына орайластырылып құрылған жастар ұйымы атауының символдық мәнін атап өтті. Оның атуынша, мемлекетаралық ынтымақтастықты күшейтудің бір жолы – азаматтар арасындағы байланыстар мен достықтың дамуы. Осы тұрғыдағы оң көрсеткіштердің бірі – Әзербайжанда қазақ туристтері мен студенттері санының артуы.
Кейінірек отандастар ұлттық музыканы тыңдап, ұлттық тағамдардан дәм татты.