Бақтияр Артаев, бокстан Афины Олимпиадасының чемпионы:
Қазіргі таңда көп нәрсені шатастырып жатырмыз ғой. Өзіміздің салт-дәстүрімізді ұмытып жатырмыз деген сияқты. Өзгенікін алып келіп кіргізіп жатырмыз. Қандай жағдай болса да біздің болмысымыз қазақ қой. Біз қай кез болмаса да қарап тұрсаңыз, бабаларымыз «әруақ» деп жауға шапқан, ия.
Кезінде бабаларымыздан келе жатқан дүние. Қазір мысалы соны бір күнде алдықта жоқ қылып жібердік. Осы үшін сақалды жігіттер сөгетін шығар. Сөксе де қалай десе де өз ойлары өзінде. Өздері біледі. Болған нәрсе болды. Оны ешкім өзгерте алмайды. Оны бүгін келіп өзгерту мүмкін емес. «Әруақ» деп шапқан. Ата-бабаларының басына барып, сыйынған емес, құран бағыштаған.
Мен өзім Олимпиадаға аттанар алдында Қожа-Ахмет Яссауиге, Баба түкті Шашты Әзізге, Қарахан, Айша бибіге бардым. Бәрін аралап, бәріне құран бағыштадым. «Өлі риза болмай, тірі байымайды» деген бар ғой. Оның бәрі жайдан жай алынған нәрсе емес.
Кейінгі уақытта жастарымыз сәл шатасып, бұрып алып жатыр. Салт-дәстүрмен келе жатқан нәрсені жоғалтпау керек. Құран бағыштап, құрбандық шалғаным рас. Әлі де істеймін ол нәрсені. Әке-шешеме құран бағыштап тұрам. Құдайы таратып тұрамын. Мүмкіндігім болса шыт таратып, шашып, көмектесіп тұратын жағдайлар болып тұрады. Әрине, ол күнде емес. Сәті келген кезде. Бар нәрсені жоққа шығармау керек. Бекзат ағам өз алдына істеді. Мен өзімнің білгендерімді істедім. Жаман болған жоқпын. Аллаға шүкір!
Елдің сенімін Бекзат ағам ақтады. Мен де өз деңгейімде ақтадым. Мен біздің спортшылардың ол нәрсені жасап жатқанын байқағам жоқпын. Сондықтанда біздің спорт қазір құлдырап төмен кетіп қалды. Ал өзбектер қазіргі таңда осы салт-дәстүрді әлі жоғалтпаған. Осы дәстүрді ұстануда. Сондықтан да олардың спорты шарықтап жатыр.
Қазір көбісі айтуы мүмкін ол соған байланысты емес деп. Ол қазіргі жүйеге байланысты деп. Мен қанша дегенмен ойлаймын «өлі риза болмай тірі байымайды» демекші. Жолыңды ашып тұрса, нәсібеңді беріп тұрса... Сондықтан ол нәрсені ұмытпау керек деп ойлаймын. Қазірде ол нәрсе болу керек сияқты.
Assyltas tv-дан ықшамдалып алынды