Жаңа алаң негізінен жеке тұрғын үйлер орналасқан аумақта ашылды, деп хабарлайды aqshamnews.kz тілшісі.
Алматының Жетісу ауданындағы Петровский көшесі маңында бұрын бос жатқан аумақтың орнына футбол алаңы, балалар ойын алаңдары мен спорттық жаттығу құрылғылары бар жаңа қоғамдық кеңістік пайда болды. Аумағы 0,7 гектарға жуық жер «Халық қатысатын бюджет» бағдарламасы аясында көркейтілді.
Тұрғындар үшін бес балалар ойын кешені, төрт көше тренажері орнатылып, воркаут алаңы мен үстел теннисі жабдықталды. Сонымен қатар демалуға арналған пергола қойылды.
Жұмыс барысында 330 шаршы метрден астам жерге резеңке жабын, 380 шаршы метр аумаққа брусчатка төселіп, 100 шаршы метрден астам жерге асфальт жабындысы төселді. Сондай-ақ аумаққа орындықтар мен қоқыс жәшіктері орнатылды.
Жаңа алаң негізінен жеке тұрғын үйлер орналасқан аумақта ашылды. Бұған дейін бұл маңда балалар ойнап, тұрғындар спортпен шұғылданатын жабдықталған орындар жеткіліксіз болатын.
2026 жылы Жетісу ауданында «Халық қатысатын бюджет» бағдарламасы бойынша көркейтуге бағытталған 25 жоба жүзеге асырылып жатыр. Оның 18-і аяқталды, қалған жетеуінде жұмыс жалғасып жатыр. Жобаларды биыл қарашаның соңына дейін аяқтау жоспарланған.