15 мамыр күні АҚШ президенті Дональд Трамп Таяу Шығысқа сапары аясында Біріккен Араб Әмірліктеріне барды. Трамптың ұшағы Абу-Дабиге қонып, оны БАӘ президенті шейх Мұхаммед бен Заид Әл Нахаян қарсы алды. АҚШ президентін әуежайда дәстүрлі "халиджи" биімен қарсы алған қыздардың өнері желіде қызу талқыланып жатыр. Олардың ұзын шаштарын шайқап билеуі – көрген жанды таңғалдырмай қоймайды. Аqshamnews.kz тілшісі ерекше бидің қайдан шыққанын тарқатады.
"Халиджи" - қандай би?
"Халиджи" сөзі араб тілінен аударғанда "шығанақ" деген мағына береді. Бұл би – Араб түбегіндегі Парсы шығанағы елдеріне ортақ мәдени мұра. Нақтырақ айтсақ, Сауд Арабиясы, Кувейт, БАӘ, Бахрейн, Оман, Катар сынды елдердің ұлттық дәстүріне енген би түрі.
Шашпен билеудің ерекшелігі
Бұл бидің ерекшелігі – шаш қимылдарына негізделуі. Биші қыздар ұзын шаштарын тербеп, шайқап, әр түрлі бағытқа иіп, өзіне тән өрнекпен билейді. Бұл қимылдар нәзіктік пен ішкі қуатты бейнелейді. Шаш – әйелдің сұлулығы мен еркіндігінің символы ретінде қарастырылады.
сурет: ашық дереккөз
Қай кезде орындалады?
"Халиджи" биі тек ресми кездесулерде ғана емес, үйлену тойларында, мерекелерде, қыз-келіншектердің жиналыстарында да орындалады. Бұл – тек би емес, араб мәдениетінің нәзік коды, дәстүрге деген құрметтің көрінісі.
Трампқа әсері қандай болды?
Желі қолданушыларының айтуынша, Трамп бұл дәстүрлі биді жылы қабылдаған. Әлемдік саясат сахнасының тұлғасы үшін бұл ерекше қарсы алу сәті әрі шығыс мәдениетінің айқын көрінісі болды.
Трамп алдағы күндері Абу-Дабидегі шейх Заид мешітіне барады және «Қаср әл-Ватан» президенттік сарайында ресми қабылдауда болады. 16 мамыр күні де Америка президентінің қатысуымен БАӘ-де бірқатар іс-шаралар өтеді деп жоспарланып отыр.