2024 жылдың соңына дейін Қазақстан азаматтары Оңтүстік Кореяда заңды түрде жұмыс істеу мүмкіндігіне ие болады. Бұл туралы Еңбек және әлеуметтік қорғау министрі Светлана Жақыпова Мәжіліс кулуарында мәлімдеді. Қазіргі уақытта келісім Оңтүстік Кореяда талқыланып, келісу жүріп жатыр, деп хабарлайды aqshamnews.kz.
Еске сала кетейік, 2024 жылдың қазан айында Қазақстан Республикасының еңбек және әлеуметтік қорғау вице-министрі Асқарбек Ертаев Оңтүстік Кореяның Жұмыспен қамту және еңбек министрлігінің өкілдерімен кездесті. Кездесуде Қазақстанның Оңтүстік Кореядағы еңбек рұқсатнамалары жүйесіне — Employment Permit System (EPS) — қосылу мәселесі талқыланды.
«Оңтүстік Кореяның Еңбек министрлігі басшылықты өзгертті, сондықтан процесс сәл кешіктірілді. Құжат әзірленіп, Оңтүстік Кореяға талқылауға және бекітуге жіберілді», - деп түсіндірді Жақыпова.
Рәсім ресми түрде бекітілгеннен кейін қазақстандықтар Оңтүстік Кореяда EPS бағдарламасы аясында заңды түрде жұмыс істей алатын болады.