Қызылордалық Нұрлыбек Байменовтің бір қолы осыдан 20 жыл бұрын пойыз астында қалып, жұлынып, сонадайға ұшып кеткен. Аурухана төсегінде жатып «енді қалай күн көремін, жұмысқа кім алады мені, отбасын қалай құрамын» деп жылағанын жасырмайды.
Жоғары білім алмаған, мектептен 9-сыныптан кейін шығып кеткен. Өмірінде көп қиындық көрген. «Мына түріңмен сені ешкім жұмысқа алмайды» деп мұқатқандар да аз болмаған. Күнделікті нәпақасын табу үшін шолақ қолымен жүріп-ақ алдынан кезіккен барлық қара жұмысты істеген. Үйлену туралы мүлдем ойламайтын. Себебі, «маған кім күйеуге шыға қояр дейсің» деп, бұл тақырыпты мүлдем жауып қойған сәттері болған. Бала күнінен бұзық болғанын да жасырмайды.
Жергілікті бір ТЖО-ға жұмысқа кіріп, көліктердің қорабын бір қолымен-ақ шешіп алып, иығына салып алып кетіп бара жатқан сәтін көргендер таңқалушы еді. Ол жұмысын жақсы көрді, содан береке тапты. Бірде темір-тұлпарлардың «ішек-қарнын» ақтарып тастап, қайта құрастыратын басшысының әбжіл қимылдарына, іс-әрекеттеріне көз салып жүріп, оны да меңгеріп алады.
Бүгінде өзінің техника жөндеу орталығы бар. Иә, несие алып ашқан. Жоқтан бар жасап жүрген азамат бірнеше жігітті жұмыспен қамтып отыр. Жұмысындағы қызықты сәттерді Instagram, TikTok желілеріне салып, көпшілікті, әсіресе, жастарды адал еңбек етуге, қиындықтан қашпауға үндеп отыратыны да бар. Нұрлыбектің шолақ қолымен-ақ автокөліктің ауыр қорабын бір иығына салып алып, өз бетінше тіршілік етіп жатқанын көрген алматылық Шалқар есімді азамат жуырда оған құны көп ақша тұратын, көліктерді жөндеуге арналған құрал-жабдықтар сыйлады. Қуанышын жасыра алмаған Нұрлыбек Байменов жаңалығын әлеуметтік желіде бөлісіп, оқырмандарынан сүйінші сұрады. Шалқар замандасына алғысын білдірді.
Айтпақшы, Нұрлыбек Байменов үйленген, екі баласы бар. Келіншегі: «Екеуміздің ұрсысқан кезіміз есімде жоқ. Бір нәрсеге көңілі толмай қалса, атымды атамай, маған қарай «әу, Ержанова» деп фамилиямды зілсіз атап жақындап келе жатқаннан-ақ «Сенімен ұрсысу да мүмкін емес» деп күліп жіберетінім бар», – дейді. Мұндай жандардың өмірі бізге үлгі болуы тиіс.